هواجيس باله

يقوله خليفة من هواجيس باله

لعله يداوي نفسٍ ابطت عليله

تهيض وقاله يوم جا له مجاله

بمعنى ميعاه الوزن ما فيه ميله

سرى الليل به لو كان مع هم طاله

والافكار كنها هي نجومٍ بليله

وانا اللي فخر به دوم عمه وخاله

بفعله يبرهن ما قصد به بقيله

ولا قط أبداً هو شكى لاحد حاله

لوحده وحمله ما تشله قبيله

وعى دوم لا منه سهى كل داله

فلا يوم شيٍ قد أخذ منه حيله

على ما بغى يصخى بجهده وماله

وكفه مهي عند اللوازم بخيله

على الغير ما هو مثل من صار عاله

خفيفه حياته لو أموره ثقيله

ولا هو من اللي كل ما راد ناله

خذ اشيا ولكن غيرها جت بديله

كأنه ملك له بعد خبرة وكاله

بها له شهادة قد كتبها كفيله

اذا ان النبالة عكسها بالنذاله

تراها السفاله عكسها بالفضيله

علوم المراجل ما خذت بالجهاله

تبي واحدٍ كنه معاها دليله

وانا اللي يعرفونه هله بالشكاله

يوم أن الردي معلوم من بد جيله

هذا قيل منهو قالها في جزاله

ولا يلتفت للي هروجه هزيله