دار الفلك

دار الفلك وسهيل بان وتجلى

وسط السما يلمع وكنه لحاله

عادة ليا منه ظهر ثم تعلى

حرٍ شهر فالجو والغيم شاله

هل البراد وزان بالٍ تسلى

يوم ان تغير واستوى له مجاله

عامٍ مضى واللي مضى به تخلى

عن ما تمسك به رخت له حباله

وخلاف ذا ياللي علينا تبلى

جاك الجواب اللي وصلنا سؤاله

امليت لك دامك ورانا تملى

وانا الذي محشوم عمه وخاله

الدم لا منه بجسمك تطلى

سيفي تضرج به بعدها وساله

القمل في راسك ليا من تفلى

في كوب كنها باقيه كالحثاله

الضيم عنا بالعدل كنه ولى

والحق مآخوذٍ بليا وكاله

والمر من ذاقه ترى به تحلى

واليا صعب من بعد هو به سهاله

لا قلت لك كل ما تناشدت كلا

فاعلم باني صانعٍ بك جماله

هلا فهمت الراي يا هيه هلا

ولا ترى الفنجال بعده بياله

وان قلت لك ولا فلا تقول ولا

شورك ترى فيه الخطا بالجهاله

واللي بداره حاكمٍ ما تولى

شي بحياته غير هو صار عاله

لستار في المسرح ترى هو تدلى

والمشهد اللي بان خط الرساله

تم المقال اللي بعد ما تكلى

منهو يقوله لا طرى له خياله