واحكم نظامه

‏بن عطيه قالها واحكم نظامه

كنها وسط الفلا في عشب ريمه

النظر ما فاد زرقاء اليمامه

‏والكذب لمسيلمة كنه لزيمه

‏هوذه اللي هو حكم ليس بثمامه

‏ولحنيفه واديٍ هاجر مقيمه

كل فارس بالوغى يشهر حسامه

والخسارة بالنصر كانت وخيمه

والذي يجهل مع العالم مقامه

كالذي نفسه رخصها دون قيمه

ليل ياللي فايقٍ به ليت نامه

كل من فكره بدى كنه خصيمه

والفتى لولا خواله مع عمامه

ما يفيده طيب من عده نديمه

النبى يبقى على الدنيا علامه

للرجل ويحاسبه منهو غريمه

لا لحقني من مواليني ملامه

عذرهم من دون لا قيمه وشيمه

كان في حربه بعد او في سلامه

كل عظيمٍ كانت علومه عظيمه

حيث قرم القوم تاقت له زعامه

يوم لاش الناس لاقت له هزيمه

والمراجل بالنهى ويا الشهامه

ما عرفها واحدٍ يحرس حريمه

والهلايم عيبها دوم الغشامه

والدواهي طيبها روسٍ فهيمه

والجمايل لا نست ذقت الندامه

والفعل عن قول يحتاج لعزيمه

والبعير اللي قبض كفي خطامه

صاحبه ربي جعل ما هو يديمه

والولد ما زاد من قدره وسامه

والبنيه تنبغى لانها حليمه

والقشر ما به فخر لو به صرامه

يرحم الله ناس هي دايم رحيمه

ما تطير بريشها والله نعامه

والبخل بالنفس لو كفٍ كريمه

والرخوم اللي على درب الرخامه

كالدبش لا من غدت خلف البهيمه

الكحل بالعين تقطر منه شامه

فوق خد اللي بكت لانها يتيمه

ما عشقها غير هو من في غرامه

بالضنى ضحى بغاها لو عقيمه

مثل قيلٍ هو معه ناظم كلامه

وافيٍ دام النوايا به سليمه

لين ما اعلن بعد بدعه ختامه

مثل ما كفت بعد مهطال ديمه