يباهي

قالها بن عطية كنه معها يباهي

لا طرت له وفيها طاريٍ به طراوه

داهيه من نظمها حير ابها دواهي

والذكا بالتغافل كنما به غباوه

لا صحى بعد سجة كل من كان ساهي

كم قويٍ بضعفه ما حدٍ جاه قاوه

ويش منظر لمحته كنما لاح زاهي

ما توضح ولكن غامضٍ من نقاوه

فيه علمٍ بحجة عالمٍ فيه واهي

والتحضر ترى هو مثل سلم البداوة

آمرٍ كنه عاده لا أمر صار ناهي

ما تساوى به اللي كل ما قيل ساوه

لغز منهو سؤاله كل ما صب شاهي

يشربه من جوابه ما نقص به علاوه

كل جاهٍ تماثل لا تقارن بجاهي

والتردد ترى هو مثل طبع الجراوه

تم قيلٍ بديته ليس انا معه راهي

مثل قصرٍ تهاوى فوق بابه سماوه