يا ضي

يا ضي دام الوقت ما له امخاوي

وانتي ملاذي لا دهتني دهايا

ماني على الدنيا كثير الهقاوي

لكنها زادت علي الرزايا

وأنا خليفه للبلاوي بلاوي

ياما ثنيت ظنون ويا نوايا

لو كان ما لي عزوةٍ بالعزاوي

جيتي هديه ما بعدها هدايا

كني بهالدنيا بدارٍ خلاوي

اليا انزويت بفكر بين الزوايا

واهل الفعايل غير اهل الحكاوي

لو كان ما سووا مثلهم سوايا

عليك يا ربي كبار الرجاوي

وانت السراير شفتها بالخفايا

معاك ما خابت ابد اي دعاوي

حتى ولو معها تزيد الخطايا

لقدام به تحقيق كل المناوي

اللي بطت كنها بقلبي سبايا

ولا الجلاوي طول عمره جلاوي

معروف هو من بد كل البرايا

ما له مع العربان غير الحراوي

كنه بجسمٍ دم بين الخلايا

لكن كفه بالمكارم رهاوي

عطيته ما هي بمثل العطايا

منها عديم الحال اضحى غناوي

وانهى بعدها ديون منها قضايا

والدين لا منه غدى هو سماوي

فيه الوصايا غير عن كل وصايا

والبشت لو يلبسه والله فداوي

ما له من المشلح ابد من مزايا

بالعز انا قضيت عمري شقاوي

والذل قبله لذ طعم المنايا

ذا قيل من قوله لقافه نقاوي

كنها ابياته بعد حربٍ ضحايا