كنها هلت

يقول العطية نظمةٍ كنها هلت

تقل غيمةٍ وسط السما برقها ما بات

تعلت وهي كنها تدنت ليا علت

معاها هجوسٍ قلت له خذت شي وهات

لكل حاجةٍ كثرة ولكن لا قلت

بتغلى ولو يرخص بها ما كثر بالذات

ترى المشكله تكبر وتصغر اذا انحلت

واذا روحت بالحمل طاحت وكنها جات

رمتني ولكنها مع الداء لا انسلت

وبالعز انا حيٍ ولو مات منهو مات

وأنا نفسي من الطيب كلت ولا ملت

وما قد حصل عاده ترى مثلما ما فات

وراسي بها مرفوع لو انها زلت

لانها تعني به على اللوم والشرهات

ولاني بنشادٍ عن اقوام لا ذلت

زمنها قردها والقراده لها هامات

الأيام حبلى لا احذفت شي شي شلت

ولا الغيب معلومٍ وذي آفة الافات

بعد عهد قيصر كنما الروم قد ضلت

وكسرى وصل جيشه على حد الاهرامات

وتمت ولا كفت ولكنها حلت

وهي منها اهات لكن بلا ونات