في طراوه

قالها لك بن عطية يوم جاته في طراوه

من هجوسٍ عودت به رادها بالٍ نحاوي

شين منهو كل ما هو لا تلقف بالفضاوه

عاد كنه هو بعدها مثل ملغٍ للحزاوي

لا تخاوي لك ذليلٍ بل عزيز القوم خاوه

قوله اللي مثل فعله في رخى ولا بلاوي

وان تجرى في كلامه كم سفيهٍ في ضراوه

لا سفهته بالهذاري في هوانه مع حكاوي

والخباثه عند أهلها غيرهم هم بالنقاوه

من كلامه هو مقامه كل واحد له هقاوي

والذي داواك جرحه بعد جرحك عود داوه

كلب لا منه نبح لك غير ذيبٍ معك عاوي

من عليك اللي تخبى قوم وقف له وراوه

يقطعك يا من غموضه في وضوحه كنه ناوي

شعر أبو الطيب تعدى سقف داره بالسماوه

وافحم التاريخ لو هو يرتزق به لانه غاوي

والحضاره مثلها هي مثل عادات البداوه

طبع يغلب عن تطبع والهوى عند الهواوي

تمت ابياتٍ وجيزه كنها جتني علاوه

فوق راتب في ثمنها امية الفٍ هي تساوي