الملحمة البكرية

ابدى مقالي بالسلام

بدعٍ بميمٍ له نظام

خليفه اللي به يقول

قولٍ جزيلٍ بالكلام

ابن عطية لا نواه

قامه كما هو له مقام

يذكر به اللي هو يعود

ويروح في باله دوام

من هاجسٍ هو له جديد

غير اللي اضحوا هم قدام

له طاريٍ مثل الهبوب

لا صوتت بين الغمام

ماني بساهي او سليت

والعلم لي هو بالعلام

احسب أنا حسن الحساب

وأفرق حلالٍ عن حرام

كل حي بالدنيا مجال

يبخصه ويعده مرام

لا واهني منهو يعيش

بالوقت خالي من غرام

ثابت مهب مثلي يجول

واليا وقف هام بهيام

الحب أنا فيه القتيل

لا من رماح ولا سهام

اديت له كل الوجوب

لكن ترى قل المهام

من صاحبٍ لا منه غاب

يحضر ترى لو في المنام

أطلال له وبها نزيل

تبنى بعد ما هي حطام

لا من نوى هو ما بغاه

أحدٍ بلش هو بالركام

عرصات تخلى بالمكان

هي بالحجاره والهدام

معها ولو اني قويت

أضعف وانا قرمٍ همام

سبةٍ شجونٍ مع حنين

كن عدت أنا منهم غلام

لي ذكريات هي ترود

في كل صلاةٍ او صيام

بس دايمه واليا لهيت

ارجع جلوسي للقيام

كني معاها في رحيل

من فوق مشدود الزمام

شادت ليا عادت صروح

هي قبلها قفرٍ عدام

بعيد لو اني قريب

وحيد لو حولي زحام

لا يا وليفي وش عليك

صافي شرابي والطعام

يا جعلهم والله فداك

خوال واهلٍ مع عمام

ليونتك لمع الحرير

نعومتك ريش النعام

منك ترى يا من هويت

قل اللحم فوق العظام

احدي ثم هجيني واعود

على الهلالي والنهام

ليتك رحمت الله رعاك

منهو زعل دون الخصام

لانه بعد وصلٍ قطوع

ما عاش ابد عقبه وئام

كل ما تركد بك تراه

رد وحصل معه احتدام

حتى القرايب والرفاق

هم اصبحوا ضمن الفهام

درب الحياه اللي مشاه

مثلي فنى بالارتطام

واليوم يشرق بالغتار

والليل يغرب بالجهام

ترى التغيشم للفطين

والفطنه هروج الغشام

كل شي بالدنيا يزول

إلا الكرامه بالكرام

والوقت به كل شي يهون

غير اللئامه باللئام

كم حرب فيها مثل جيش

فارس ولو ما له حسام

ترى الشجاعه بالجبان

جابت مدايح من ملام

ولا التساخي من بخيل

هو جا معه ضمن اللزام

أنا ولد عبدالعزيز

يعد من خير الانام

رجلٍ على دينٍ قويم

ما همه اللي له صدام

والأصل مذكورٍ حنيف

من وايلٍ راس السنام

بكري وانا بآسي شديد

اضيم ولا لا اضام

يكمل معي كل شي تشوف

او تسمع ان ما له تمام

وزني خفيفٍ او ثقيل

ما قيل كيلو او قرام

اسلس من اللي له مرون

لكن لي حدٍ صرام

واليا قطعت أحدٍ يصير

من بعد ما له من لحام

كالحر لا منه شهور

بالجو يدوي عقب حام

والبحر لو موجه لطوم

به كنما قرشٍ وعام

ما همني منهو وراي

ثاني علي ولا بذام

عشت الحياه اللي بغيت

والرأس مرفوع بشيام

طعم الفضيلة هو لذيذ

صافي وغيره لي بسام

يغتابني عند الغياب

واشي وخلفي دوم نام

ولا العدو ولا الصديق

كلٍ غدى مع زم زام

عصاميٍ في ذالحياة

يوم ان غيري له عصام

والحرب ترمزها اسود

والسلم يرمز له حمام

والنصر يبغي له جهود

ولا الكسل هو بانهزام

وخلاف ذا عندي بلاغ

كنه نقش فوق الرخام

قم شله ووده وعود

نديب لي ضمن العوام

ابلغ بني قومي قصيد

قلته وانا ما لي عسام

عل وعسى هم يحفظون

قيلي بقدرٍ واحترام

الوقت هذا من قواه

ضعيف خاف الانتقام

كل من دنى به يعتليه

رغم الذي ما له رغام

كم سيدٍ هو لا يسود

من خادمٍ ما له خدام

دنياك هاذي يا حريق

كالنار شبت بك ضرام

ما ترحمك عند الخطوب

ما تنصفك عند القسام

لا تخدعك هي في رخاك

لو علقت فوقك وسام

في شدتك هي تبتليك

تلزمك في وقت اللزام

حتى تراويك السنين

ايلين تبصم بالبهام

لو تنضمن في كل حال

ترى على ما هو يرام

هذا وانا يا من بعيد

قريب قصرٍ له رمام

حكام جاته هي صفوف

منهم غدى مثل الجذام

هو باسم شيخٍ به دفين

قبره وسط غيهب ظلام

قد كان يكرم كل ضيف

والجار له دوم احتشام

دخلته وشفت الجدار

ساقط على حوش الخيام

والسقف طايح فوق حوش

لا طاح قدر اللي طغام

سبحان منهو ما يموت

ويموت مأموم وامام

عبرة ترى والله كريم

منهو يشافي بالحجام

واحد ولا له من شريك

ولا شبيهٍ باحتكام

يدعيه منهو ما يراه

معبود هو مغرب وشام

حتى الذي هو بيعصاه

يستغفره عقب الاثام

واللي سرف هو بالذنوب

يوم استحى مد اللثام

ادم خلق هو من تراب

مريم بعيسى هل تحام

هذا الاله اللي ودود

من بالكماله هو يسام

والناس تفرق من عقول

حتى ولو بالانسجام

وقلوبها خلف الصدور

تقسى ولو كانت رحام

تبقى الفعايل هي شهود

وأقوال ما منها غنام

الحق له دايم رجال

على الذي يخطي كعام

والزور له عاد الرخوم

اقزام لو هي به ضخام

هذا وانا قلت المقال

اللي بيوته به جسام

من غير ما ابطي بالمبيت

في نصف ليله كالرجام

حيثي عسيف الملحمات

بالشاردات اللي قصام

ابيات لا عدت تعاد

من طيبها عند اللمام

أنا الأديب اللي يجيب

ما جابه اللي بالكتام

عند اللوازم لو ينوب

عني ترى ما هو حزام

غيري يريد اللي اريد

لكنني مثل السقام

انفي وانا اللي ما نفاه

احدٍ ابد رغم الجزام

بديتها لين انتهيت

هذا ترى مسك الختام