وابدى خليفة

بن عطيه قالها وابدى خليفه

يوم بعض الناس تستره المخافه

وش على شرواي من لومة وليفه

للنعاره راس مرفوع بصلافه

والنفوس اللي حيت دايم منيفه

موتها في عزها ما به كلافه

قلبي اللي كل نياته نظيفه

ما يهاب الوقت وإن ذاق الحسافه

والعلوم اللي على بالي طريفه

ما تعد إلا بكل ذوق ولطافه

يا هياكل تمتحني في وظيفه

الولايه ما تكفيها خلافه

منصبٍ فيه الرخم يقعد بكيفه

عله يصدق شعارات الخرافة

مجلسي مفتوح به محشوم ضيفه

والمآسي للكراسي بالصحافه

والفقيّر منه مسروقٍ رغيفه

من وزيرٍ ما حدٍ سمعه وشافه

كم بلادٍ بعد قوتها ضعيفه

غابةٍ صارت تحت عنق الزرافه

والليوث اللي مخالبها نزيفه

صدها فيلٍ يهرول باللقافه

يا ربيع العمر ولا يا خريفه

بيت ربي سبعة اشواطٍ طوافه

والبيوت اللي بها ألفين جيفه

الخنى يطوي لها دايم لحافه

دام لي سيرة مع ربعي شريفه

وش علي انا من هروج السخافه

هو حليفي كان ولا انا حليفه

الظفر لا من تغلفني غلافه

صاحبي وانا معه درعه وسيفه

يوم ولد اللاش يبطي في عيافه

والشروق اللي جذب شوفي بطيفه

كالغروب اللي فجعني بالمسافه

كل سيلٍ لا حدر نعرف جريفه

والجبل من يسكنه عاش بجلافه

كف طماعه على كفٍ عفيفه

بالمصافح ما تساوت يا صرافه

والقليصه دايماً تبقى رديفه

غير هامة تنطح الواجب شغافه

قلتها والعين ما منها ذريفه

دون حفلات السياحة والثقافه