يوم ان نواها

بن عطية قالها يوم ان نواها

واحتواها وابتداها وانتهاها

بدعةٍ من قلب حي وراس طيب

لا سمعها من فهمها ما نساها

هذي الدنيا دنيه ما عليها

اي حسافه باعها منهو شراها

تقبل وتدبر ولا هي مستكنه

والبشر فيها دمى تلعب معاها

بين مد وجزر وامواجٍ تلاطم

والرياح العاتية تدوي دواها

الله أكبر يا زماني وش بقى بك

ما حصل وأحداثك اللي وش وراها

الليالي بالخلايق ما توانت

بالرزايا من خذاها ما عطاها

كنها الأيام بصدوفٍ تتابع

قصةٍ منهو سمعها ما قراها

ما علي من كل حاسد لي وحاقد

والبلاوي ما يهمني وش بلاها

حيث أنا مقبل على أمري وشاني

تاركٍ كل من بغاها ما لقاها

والحوادث من ضمنها في حياته

كل حيٍ صفحته فيها طواها

قلتها وانا بها بحت الخوافي

كنها حلمٍ غفى به من طراها