يا صحبتي

من مبلغٍ عني هلي يا صحبتي

اني بعد ما ردت والله رادني

كني بها الدنيا غريب بلا وطن

وانا بدارٍ ما بها وش فادني

تمضي حياتي كنها حبلٍ يتل

اليا جذبته بي نقص ما زادني

الله ولا يا مسندي غدر الزمن

لا حاد عني وانتحى ما حادني

مهما هربت أنا من كتاب القدر

من قبل ميلادي ترى هو صادني

فلا الحذر ينجي من اللي ما جرى

والفوت ما عود على ما عادني

نفسي بقت حرة ولكن ما بها

قيدني اللي عنها ما قادني

والدهر منه كم تجارب شفتها

واجديت انا يوم انه معها جادني

ما همني كثر الملامه والعتب

ما دام محدٍ هو معاها بادني

ولا المدايح والنصايح ردتها

واللي هدمني بعدها هو شادني

والله بمكره فاق كل اللي مكر

لا كاد لي محدٍ ابد هو كادني

تم المقال اللي بدعته وانتظم

من هاجسٍ بي ساد لا من سادني