وهو دايم

خليفه قال ما قاله وهو دايم

ليا منه بدى شيٍ بعد تمه

بشهرٍ فيه كل مسلم غدى صايم

بعد مغرب معه كنه ورد جمه

وهو جالس ومن حوله حدٍ قايم

وله يحكي وثم يشكي سبب همه

رفيقٍ له على بوحه مهب لايم

ليا غيره كشف سره مع النمه

سما فيها تحت شمس الضحى حايم

مع الغيمة وهو محمول مع غمه

وفي بحرٍ بظلما ليل هو عايم

تقل موجه تغطى به ليا ضمه

مهب انسي واذا جاني وانا نايم

كأنه لابسٍ ثوبٍ سحب كمه

كما الجني ليا من ضام له ضايم

بمأكوله ومشروبه مثل سمه

على ما اروم انا دايم معي رايم

بعد كل شي ترى بريت بالذمه

ليا من هام به ما عاد بي هايم

سوى في حفرةٍ ولا على قمه

ولو ما شام انا ماني ابد شايم

مثل عمي وانا ايضا مثل عمه

وذا الهاجس وبه قد صرت انا زايم

على غيري ليا دمي خلط دمه