ما صاحبه لوم

قال العطية قيل ما صاحبه لوم

إلا من اللي دوم واشي ونمام

حتى ايش يا من تجهد النفس بالزوم

لانته بها ظايم ولا أنته بمنظام

خلك على قدك ولا أنته بملزوم

على مجالك تم لا همت بهيام

ولا فانا ماني مع الناس مهموم

رزقي على اللي له سجد عبده وصام

وانا بعون الله عن الكفر معصوم

حيثي على الدنيا عزيزٍ بالاسلام

ماني لك الله بين الآنام محروم

قسمي غنمته بين توزيع الاقسام

صكات بقعى لو تحاشد بالزحوم

أسمي فخرها بين صفحات الايام

طرفي نعس لكن ما عاد بي نوم

مدري أنا وشلون باشوف الاحلام

الطيب ينسونه بعد يومٍ ويوم

ولا الردى مذكور عامٍ بعد عام

ما غير رب الكون له عبد مرحوم

والوقت ما يرحم ولا ترحم ارحام

والناس ممدوحٍ معاها ومذموم

لا عاد كلٍ عاش رايم ومنرام

منهو حشم نفسه بقى دوم محشوم

لو كان عبدٍ عد ما بين خدام

واللي رخصها لا رماها على الشوم

ما له ابد اي قدر ما بين الانام

لي بين ربعي ولد عمٍ تقل توم

قدام لا افعل ولا اقول مقدام

طوفان أنا لا عمت وياي بيعوم

نعم الخوي والله ما مثله حزام

هذاك أنا لا ضدني كل شغموم

ياقف معي لو هو على ساحة إعدام

ومطوعٍ خياط قصر له هدوم

لحيته هي كنها على وجه حاخام

القدس كم فيها من الظلم مكلوم

يبقى صلاح الدين هو غير صدام

وش عاد يا حكام لا قيل شالوم

أنتوا ترى بين العرب بس حكام

كنكم على الشعوب والله جاثوم

من غرب بالمغرب الى شرق بالشام

كل من حفر له قاع خلاه مردوم

هو بعدها من كثر ما شاف الاعلام

واللي بنى بنيان له صار مهدوم

حيث أنه الواقع مهب مثل الافلام

حنا بني وايل مناعير وقروم

بين العرب سدنا على كل ضرغام

ما نلتفت لهياط وعياط الرخوم

امجادنا ما هي من اقلام وافام

بالدين وفينا العوايد والسلوم

لا ما حسبنا حساب الاموال بارقام

به فرق ياللي تنشد السعر بالسوم

‏كانك جهلت الصنف فالغير علام

‏والحر حرٍ كنه القرم بالقوم

‏والبوم بومٍ كنه اللاش لا قام

‏والقيصر اللي عز هو يحكم الروم

‏لكن كسرى هان فارس ولا دام

تميت قافٍ في عجل كان منظوم

من غير لا أوضح أبد شي به هام