كنما قايله

قال العطية مقالٍ كنما قايله

جاوب به الهاجس اللي عاد هو سايله

قيلٍ به الحكمة اللي طاب منطوقها

من فكر راسه ليا منه ثقل شايله

جربت الايام انا تجاربٍ ما لها

حدٍ ابد كل ما تعدل غدت مايله

الوقت كنه ليا منه مضى ما قضى

أحواله اليا جرت من ثم هي زايله

منهو على فوق عود من بعدها تحت

واللي قصر كل ما طول قصر طايله

أحدٍ لحاله كفى قومه ليا من حضر

وإن غاب كنها معه قد غابت العايله

وأحدٍ بلا أي مضره منه أو منفعه

به صايله خاب لا من خاب به جايله

العز لحظة بها لو مات منهو حظى

والذل عمرٍ معه لو عاش به نايله

ولا الفتى لو مرامه في حياته صعب

منه سهل بعد ما هو حال عن حايله

والما عليه انكتب شيٍ ولو كاتبه

خطه على الرمل وضح ما سفى هايله

مثلي مثل عمرو بن كلثوم في شهرته

به يفتخر كل من هو ضم مع وايله

هذا كلام الذي هرجه ليا من حكى

منه عدوه يحسب أنه بدى غايله